කොරෝනා සමයේ ලංකාවේ පාසැල් දරුවන්ගේ දුරස්ථ අධ්‍යාපනය


Posted on May 13, 2020  /  0 Comments

May 11, 2020

මාර්තු 12දා හදිසියේ පාසල් වසා දැමීමත් සමග ශ්‍රී ලංකාවේ අධ්‍යාපන පද්ධතිය තුළ අර්බුදයක් නිර්මාණය විය. එක රැයින් තම ඉගැන්වීම් ක්‍රමය අන්තර්ජාලය පාදක කරගෙන දුරස්ථ ආකාරයට හැඩගස්වා ගැනීමට ගුරුවරුන්ට සිදු විය. අගෝස්තු මාසයේ සිට ඉදිරියට පැවැත්වෙන පහ ශ්‍රේණියේ ශිෂ්‍යත්ව විභාගය, අ.පො.ස. උසස් පෙළ හා සාමාන්‍ය පෙළ වැනි විභාගවලට සූදානම් වන සිසුන්ගේ ගැටලු කෙරෙහි වහා අවධානය යොමු කළ රජය රූපවාහිනී මාර්ගයෙන් පාඩම් ඉගැන්වීම ආරම්භ කරන ලදී. සංවර්ධිත රටවල මෙන් නොව, විද්‍යුත් ක්‍රමයට ඉගෙනීම හෝ දුරස්ථ අධ්‍යාපනය ශ්‍රී ලංකාවේ අධ්‍යාපනික සංස්කෘතියේ කොටසක් වූයේ නැත. එබැවින් ඒ සම්බන්ධ නවෝත්පාදනයේ හදිසි අවශ්‍යතාවක් ඇති විය. ඊට අමතරව, මේ කොරෝනා වසංගතය අද  හෙටම සම්පූර්ණයෙන් තුරන් වන එකක් නොවන එකක් බවත් පැහැදිලිය. එම නිසා දීර්ඝකාලීනව මෙවැනි තත්වයන්ට මුහුණ දීම සඳහා  දුරස්ථ අධ්‍යාපනයට අදාළව  ගත යුතු තාක්ෂණික මෙන්ම අධ්‍යාපනික වෙනස්කම් කෙරේ අප   අවධානය යොමු විය යුතුය.

එම නිසා ශ්‍රී ලංකා අධ්‍යාපන සංසදය විසින් “ආපදා අවස්ථාවලදී  දුරස්ථ අධ්‍යාපනය” මැයෙන් සංවාද මාලාවක් සංවිධානය කරමින් දුරස්ථ අධ්‍යාපනයේ තාක්ෂණික මෙන්ම  හා අධ්‍යාපනික (Technical and Pedagogical) යහභාවිතාවන් හඳුනාගෙන ප්‍රතිපත්ති සම්පාදකයන්ට නිර්දේශ ඉදිරිපත් කිරීමට ඉදිරිපත්ව සිටී. පසුගියදා පැවැත්වූ සංවාදයකදී අපට ප්‍රත්‍යක්ෂ වූ ප්‍රධාන කරුණු තුනක් මෙහිදී හුවා දක්වමු.

පාසැල් සිසුන් ඇති පවුල් වලින් 60%කට වැඩි ගණනකට අන්තර්ජාල පහසුකම් නැත.

ලර්න් ඒෂියා ආයතනය මගින් 2018 දී කරන ලද සවිස්තර සමීක්ෂණයකට අනුව, වයස 18 ට අඩු දරුවන් ඇති කුටුම්බ වලින් අන්තරජාල පහසුකම් ඇත්තේ 34% කට පමණි. එයින් බහුතරයක් මෙම පහසුකම ලබාගන්නේ සුහුරු දුරකථන හරහාය.

මෙම අන්තර්ජාල පහසුකම් ඇති පවුල් අතරින් ඔන්ලයින් පංති කාමරඅත්දැකීම(Online Real-time Classroom Experience) ලැබෙන්නේ අතලොස්සකට බව අපට පෙනී යන්නේ කොළඹ පිහිටි සමහර ජනප්‍රිය පාසල් වලට පවා මෙම පහසුකම දීමට නොහැකි වීම නිසායි.  මෙම අත් දැකීම සාමාන්‍යයෙන් සිසුනට ලැබෙන්නේ

දිනකට පැයක් දෙකක් අතර බවත්, ඔවුනට ඒ සමගාමීව පෙළ පොත් හා වෙනත් අනුපූරක අන්තර්ජාල සම්පත් තුලින් ස්වයං අධ්‍යාපනයකට අවස්ථාව ලැබෙන බවත් පෙනෙන්නට ඇත. මේ අයට ගෙදරින් පමණක් නොව පාසලෙන්ද ලැබෙන තාක්ෂණික සම්පත් ඉහල මට්ටමක පවතී.

ඇත්තටම අන්තර්ජාල පහසුකම් ඇති පවුල් 34% දරුවන්ට දුරස්ථ අධ්‍යාපනය වැඩිපුරම ලැබෙන්නේ වට්සැප් වැනි ජංගම ඇප් හරහා ලැබෙන  සටහන් හා ප්‍රශ්නෝත්තර ගොන්නක් ලෙසයි. දෙමාපියන්ගේ පුද්ගලික හෝ  වෘත්තීය කටයුතු වලට හෝ සුපවුලේ ළු ව්‍යාපාරයකට තම එකම සුහුරු දුරකථනය භාවිතා කරන පවුල් වලට ඇත්තටම මෙම දුරස්ථ ක්‍රමය ඔරොත්තු නොවන බව පැහැදිලි වෙමින් පවතී..

වට්සැප් හරහා සටහන් ගොන්නක් එවීම අධ්‍යාපනය නොවේ

සටහන් හා ප්‍රශ්නෝත්තර ලැබුනත්, පාසැල් දරුවන්ට වැඩිහිටි මග පෙන්වීම අවශ්‍යය. වෘත්තියෙන් පාසැල් ගුරුවරුන් වන සමහර දෙමාපියන් පවසන්නේ  තමා පාසලේ කොතරම් හොඳ ගුරුවරයකු වුවත් තම දරුවන්ට ගුරුවරයකු වීම අමාරු බවයි.  අනික් අතට ගෙදරට දැනට ලැබෙන තොරතුරු බොහොමයක් පාසල් පෙළපොත්වල ඇති තොරතුරුම හෝ දැනටමත් දරුවන් සතු ප්‍රශ්නෝත්තර කට්ටල වේ. වට්සැප් හරහා මෙසේ කරුණු එවීම අධ්‍යාපනය නොවේ. ඇත්තටම ගෙදරදී දෙමාපියන් කියා දුන්නත් පන්තියේ ගුරුවරයා කියා දුන්නත් මෙසේ  විභාග සූදානම සඳහා දරුවාට කරුණු පිරවීම කිසි සේත්ම අධ්‍යාපනයක් නොවේ.

කරුණු පෙවීම වැලක්වීම තුලින් වඩා ඵලදායී දුරස්ථ අධ්‍යාපනයක්?

ඇත්තටම තත්ත්වය එතරම්  නරක නැත. ලර්න්ඒෂියා ආයතනයේ 2018 සමීක්ෂනයට අනුව, ලංකාවේ සමස්ත මිලියන 5.5 ක කුටුම්බ සංඛ්‍යාවෙන් එක්  සුහුරු දුරකථනයක් හෝ ඇත්තේ  ඉන් 46% කට පමණක් වුවත්, කුටුම්බ 97% කට යම් හෝ ජංගම  දුර කතන පහසුකමක් ඇත. ඇරත් රජය විසින් 5-11 ශ්‍රේණි වල සෑම පාසැල් දරුවකුටම සෑම විෂයකටම අවශ්‍ය පෙළ  පොත් ලබා දී ඇත.  සෑම ගෙදරකටම තැපැල් පහසුකම් ඇත. 2016 වන විට ටීවී සම්ප්‍රේෂණ 86%ක් පවුල් වලට ලබා ගත හැකි බව සංගණන දෙපාර්මේන්තුව වාර්තා කර ඇත.  පාසල් නැවත ආරම්භ වූ පසු පාඩම් මගහැරුණු සිසුන්ට උපකාර කිරීමට අමතර කාලය යෙදවීමටද  ගුරුවරුන් සූදානම්ය.  

එම නිසා උගන්වන කරුණු ප්‍රමාණය අඩු කරගනිමින්, වඩා  වැදගත් සංකල්ප හා ක්‍රම විධි ගුරුවරුන්ගේ අවම මග පෙන්වීමක් යටතේ සිසුන්ටම ගවේෂණයෙන් හා අත්හදා බැලීමෙන් ඉගෙන ගන්නට සලස්වන්නේ නම් මෙම අඩු තාක්ෂණික ක්‍රම වලින් වුවද ඵලදායී අධ්‍යාපනයක් ලබා දිය හැකි බවට මූලික දත්ත අප සතුය. ඊට අමතරව සෑම සිසුවකුට ම අවම තොරතුරු  හා සන්නිවේදන තාක්ෂණික පහසුකම් ලබා දීම පිළිබඳවද අප විසින් අධ්‍යයනයක් ආරම්භ කර ඇත.

ඇඳිරි නීතිය ලිහිල් කළත් පාසල් පටන් ගැනීම තව ප්‍රමාද විය හැක. ඉදිරියටත් නැවත හදිසියේ පාසැල් වැසීම් සිදු නොවේ යයි සහතිකයක් නැත. එම නිසා “තාක්ෂණයෙන්  පොහොසත් හෝ දුප්පත් සිසුන් සැමට වඩා ඵලදායී දුරස්ථ අධ්‍යාපනයක්” මැයෙන් සංවාදයක්  මැයි 16 සෙනසුරාදා 230-500 දක්වා කාලය Zoom හරහා පැවැත්වීමට නියමිතය. ඒ සඳහා සහභාගී වීමට කැමති නම්   eduforumLK@gmail.com හෝ ෆේස්බුක් හරහා අපට පණිවිඩයක් එවන්න. මීට පෙර සංවාදයට සවන් දීම සඳහා

වෛද්‍ය ටාරා ඩි මෙල්

ආචාර්ය සුජාතා ගමගේ

සම සම්බන්ධීකාරක, ශ්‍රී ලංකා අධ්‍යාපන සංසදය

Leave a Reply

Your email address will not be published. Required fields are marked *

*

*

*